نظف كابراتيرك بايدك

السلام عليكم ورحمة الله وبركاته انا قررت ان افك الكاربراتير واقوم بتنظيفه بنفسى وانقل لكم تجربتى مع الكاربراتير واتمنى ان يستفيد الجميع (السيارة بولونيز): اولا نفك كل حاجه متوصله بالكاربراتير وهما خرطوم البنزين وده واصل من تحت ومن الخلف نشد الكلبس بتاع واير البنزين ولو موجود سوسته نشدها ونخلعها من الكاربراتير وطبعا نفك العمه بس نخلى بالنا من الصواميل علشان ما تقعش صاموله جوا الموتور ويستحسن ان وانا بفك احشر اى قماشه جوا الكاربراتير علشان امنع دخول الصاموله اصلا . ثانيا هنلاقى الكرابراتير مربوط ب4 مسامير هنفكهم واحنا ماسكين الكاربراتير مع اخر مسمار علشان ما بقعش . اللى جاى ده محتاج حذر شديد والبعد عن اى مكان فيه تراب او اى شرارة نار واوعى تولع سيجاره او ولاعه او اى شىء تحذييييييييييييييير ناخد الكاربراتير وهنلاقى من فوق مسامير مربوطه على وش الكاربراتير نفكها كلها هنلاقى جوان راكب نشيله ولو مش سليم نجيب واحد جديد غيره طبعا زيه بالظبط الوش مربوط فيه عوامه ودى ماسكه فى الوش بعامود رفيع وفيه سوسته مع عامود نحاس صغير له سن مدبب وده مهمته ان لما البنزين يزيد فيزق العوامه فالسن المدبب يسد مجرى البنزين فيقف البنزين طبعا لازم نتاكد من ان العوامه سليمه مافيهاش اى خرم وده هيبان لو كانت فيها هوا بس ونضغط عليها ما تقبلش ضغط هنلاقى تحت جوا الكاربراتير بكات كتيير كل بك نشيله نبص على رقمه ونرسم الكاربراتير على ورقه او نصور بالموبايل علشان نعرف كل حاجه مكانها فين والموضوع بسيط جدا كل الحكايه اننا هنجيب ثنر وبنزين وفرشه دهان جديده ونمسك بالثنر بعد ما نفك كل البكات وكلها بالمفكات عادى جدا زى المسامير ونجيب الثنر ونحطه فى حاجه عميقه وكبيره علشان نتحكم فى الكاربراتير كويس وكل اللى فكيناه نحطه فى الثنر وبالفرشاه ننظف الكاربراتير من كل حته من جوا وبره بالفرشاه والثنر وبعد التنظيف نسيب الكاربراتير بكل محتوياته جوا التنر لمده 10 دقائق مثلا وبعدها هنشيل الكاربراتير ومحتوياته هنلاقيه جديد لانج لان الثنر بيشيل كل شىء منه وبعدها نحطه فى البنزين بكل محتوياته وننظف بالبنزين بنفس الطريقه ونسيبه بعدها 10 دقايق علشان يترسب كل شىء ويبقى مفيش اى اثر للتنر او لاى شىء وبعدها نشيله ونسيبه حوالى 10 دقايق لحد ما يتصفى هو وكل مشتملاته بس يكون طبعا فى مكان خالى من التراب وبعدها تركب كل حاجه زى ما كانت وتركب الوش والجوان طبعا وتنزل للعربيه وتشوف جوان الكاربراتير لو تمام تسيبه او تغيره المهم تركب الكاربراتير زى ما فكيته بالظبط وتركب كل حاجه فيه وما تنساش تجيب قماشه نظيفه علشان تسد الكاربراتير لما تيجى تركب العمه وقول بسم الله ودور العربيه بس بعد ما تكارك كام مره كده علشان تملى الكاربراتير بالبنزين وبعدها تبتدى تظبط مسمار الهوا وده طبعا بانك تلف المسمار لحد ما تلاقى الموتور اهتزازه اصبح شبه معدوم وعلشان تعرف الحريق كويس ولا لأ روح للشكمان من ورا وشوف فيه دخان اسود ولا لا وكمان مد ايدك على العادم لازم يكون بارد وريحته ريحة دخان مش بنزين هتقدر تعرف ولو ما عرفتش اى حد يظبطلك الهوا ب5 جنيه وخلاص بس الكاربراتير بتاعك رجع زيرو يا رب يكون ربنا وفقنى فى شرح الموضوع واتمنى ان تكون التجربه افادتكم وشكرا لكم